حوار مع نفسى

السلام عليكم ورحمة الله وبركاته

:D أنا فى حوار داير بينى وبين نفسى اليومين دول

ياااااااااااااااااااه باقى فتره صغيره جدا واتخرج ....  يااااااااااااه أخيرا مش هصحى بدرى تانى .... يااااااااااااه أخيرا هنام براحتى ...  ياااااااااااااه الواحد كبر اوى ..... يااااااااااااه مش قادره اصدق انه مش هيبقى فيه محاضرات أو سكاشن تانى .... يااااااااااه مش قادره اصدق انه مش فيه مشاريع نشتغل فيها ونتأخر بسببها تانى ... ياااااااااااااااه مش هعرف اشوف صحابى ونتلم مع بعض تانى

على أد ما كنتى متعبه يا كليتى إلا إنى كنت بحبك جدا جدا ... ما اتعملتش فيكي علم أد ما اتعلمت فيكي أخلاق ... فهمت يعنى ايه يبقى حد محتاج مساعده ونقف جمبه ... فهمت يعنى ايه لما تبقى مزنوق فى الدراسه وتفضل انك تشرح لحد اصغر منك عشان تساعده ... فهمت ان اللى بيساعد الناس ربنا بيساعده .... فهمت يعنى ايه أخلاق + عمل + علم = نهضه ... معادله سهلة النطق ولكن مش كله بيطبقها ... فهمت يعنى ايه نهتم بالعلم مش بالدرجات

Science Not Grades

 فهمت يعنى ايه أختلف مع صحباتى فى الرأى ونحترم رأى بعض جدا ... فهمت يعنى ايه عمل جماعى ... فهمت يعنى ايه نبقى ايد واحده .... فهمت فضل إنك تتعلم العلم وتعلمه لغيرك .... حبيت اوى جو التعاون ده ... وان الواحد مستعد يقعد فى الكليه ويتأخر عشان يشرح حاجه لزمايله يعنى من الآخر الصحوبيه والجدعنه

إخترت أكتر قسم كانوا بيقولوا عليه مُتعب فى الكليه (عشان حبيت القسم ده اوى) .... حبيت كل اللى عرفتهم واللى ما عرفتهومش فى القسم ده ... حسيت كده بناس بتقف جمب بعضها ... بصراحه طلعوا

CS Geeks 

فعلا :D :P

محترمين عندهم أخلاق عاليه اوى ... أسلوبهم مختلف عن اى حد تانى ... مش بجامل عشان ده قسمى بس بجد فعلا انا سى اس ومش ندمانه :D

اما بقى بالنسبه لأغلى صحباتى اللى عرفتهم فبجد مش هنساهم ... بالنسبه لأصحابى اللى كانوا فى قسمى وقريبيين منى اوى ... عايزه اقولهم إنتوا بجد كنز ... بابا طول عمره يقول "معرفة الناس كنوز" فعلا والله ده احسن كنز طلعت بيه ... يارب نكون متحابيين فى الله دايما :)

بالنسبه بقى للناس اللى اعرفهم معرفه سطحيه ... احترمتهم والله واحترمت وجهة نظرهم فى الأمور المختلفه بيننا والمشتركه كمان ... كان وجودكم رائع بصراحه وبيخلى للدنيا طعم "الدنيا ملهاش طعم من غير ما أرخم واتخانق معاهم" مش عارفه من غيرهم كنت هغلس على مين :D

أما بقى بالنسبه للناس اللى اصغر منى وخصوصا اللى اصغر منى بسنه واحده ... مش قادره اقولكم انتوا أد ايه هتوحشونى ... والله كنتوا خير أصحاب واخوات ... أكيد لو عايزيين اى مساعده انا ما اعرفكوش تانى يعنى هههههههههه :D :P

ربنا يوفقكن انتوا كمان واشوفكم متخرجين كده ومبسوطين دايما :)

بجد فعلا هتوحشنى كل حاجه فى الكليه .... يمكن يقولوا عليه مجنونه لما اقول ده ... بس بصراحه مش عارفه هعمل ايه بعدها ... كانت هيه كل حياتى .... مش متخيله يجي عليه الصبح ومش انزل الكليه واقابل صحباتى تانى وانه مافيش اى محاضرات ولا سكاشن هتلمنا تانى :(

هيوحشنى شكل الكليه و الناس المحترمه اللى عرفتها سواء من دكاتره او معيدين ... وطبعا مش هنسى عم فتحى اللى من غيره مش كنا هنآكل ولا نشرب فى الكليه ده :D

آخر حاجه بقى الواحد يحب يقولها لكليته ان اول جملة برمجه كتبها فيها كانت هيه ده

cout << "Hello World :)"  << endl;

وآخر جملة برمجه احب اكتبها فيها

cout <<"Good Bye FCIS :(" << endl;

سلام عليكم ورحمة الله وبركاته