السلام عليكم ورحمة الله وبركاته :-
بما إن بعد أقل من 48 ساعه سوف تبدأ إمتحانات الميد تيرم لسنه تالته التيرم الثانى بتاعتى فأكيد طبعا انا فاضيه جدا عشان أكتب :D :D
حاجه جميله إفتكرتها من أيام ما كنت فى سنه تانيه التيرم الأول
هبدأ بقى الحدوته من الأول :D
فى أول يوم من الترم الأول لسنه تانيه دخل لينا دكتور محمد عابدين عشان يبدأ معانا كورس الداتا بس بما إنه ما كانش مستعجل فقعد يرغى معانا شويه فى الأول كده وبعدين فجأه سأل سؤال وقال : "أنا عايز كل واحد يكتب هدفه فى الحياه على ورقه ويجيب الورقه ويحطها فى الصندوق ده عشان انا عايز أعرف إنتوا بتفكروا إزاى" وبعدين قال لينا انتوا عارفين ان فيه ناس بتضيع عمرها كله وهيه بتدور على هدفها ومش لاقياه
مش عارفه ليه ساعتها حسيت انى تايهه كده ومستغربه انا ازاى عمرى ما سألت نفسى السؤال ده أو حتى ليه لما كنت بسأل نفسى السؤال ده كنت بهرب من إجابته :(
المهم فضلت محتاره كتيييييييير أكتب إيه ؟؟
فى الآخر قررت إنى ما أكتبش حاجه لأنى حسيت إنى لو كتبت أى هدف فأنا مش هكون واثقه هل هوه ده هدفى فعلا ولا لأ
لكن اخدت قرار من بعد المحاضره ده انى اكيد هدور على هدفى وهحط على الأقل أهداف صغيره فى حياتى زى مثلا إنى الحاجه اللى بحبها هتعلمها كويس عشان أقدر أساعد أصحابى فيها وكمان أقدر أساعد أى حد أصغر منى بيها وده طبعا اتباعا لمبدأ الرسول الكريم "خيركم من تعلم العلم وعلمه" بجد انا الحديث ده بيحسسنى أد إيه العلم ده ثوابه كبير عند ربنا وبيدينى دفعة أمل إننا نقدر نرفع دين الإسلام ونرفع بلدنا مصر فوق.
المهم من ساعتها يعنى وانا بحاول على أد ما أقدر كل حاجه بحبها اساعد فيها بقدر المستطاع ومن ساعة ما أخدنا المحاضره ده وبحاول احط اهداف لكل حاجه بعملها وساعدنى كتير الكتاب اللى انا بقرأ فيه كل شويه لما أكون فاضيه اللى هوه إسمه
"كـــــيف تخطط لحيــــــــاتك " للدكتور صلاح الراشد
ده اول كتاب اقرأ فيه ويعجبنى أسلوبه ومش عارفه ليه لما بقرأ فيه بحس إنى متفائله جدا :)
بس كده خلصت الحدوته بتاعتى مع محاضرة الداتا ودكتور محمد عابدين اللى حقيقى بجد اتعلمنا منه كتير. فعلا يا بخت الناس اللى بتعلم الطلبه علشان رسالتهم فى الحياه جميله جدا :)
يارب الواحد يعرف يفيد الناس بالعلم اللى بيتعلمه علشان يحس انه بيعمل حاجه مهمه فى حياته
سلام عليكم
جميل جدا يا ايسو
ReplyDeleteربنا يكرمك وينفع بيكي
ربنا يكرمك انت/انتى كمان :)
ReplyDeleteعذرا لأنى مش عارفه أحدد أنا بكلم مين :D :D
اللــه
ReplyDeleteحلو قوي الموضوع يا سوسو... ازاي انا ما شفتوش قبل كده!!
بجد ربنا يكرمك ويجازيكي كل خير.. انتي فعلا من وقتها بتساعدي كل الناس وبتعملي كل اللي بتقدري عليه.. ربنا يكرمك وينفع بيكي
ويارب كل الناس تحط اهداف لحياتها وتعمل على تحقيقها وماتبقاش عايشة كده وخلاص وزي ما تيجي تيجي
اللهم ارزقنا اهدافا صالحة وساعدنا على تحقيقها يارب العالمين :)))
ربنا يكرمك وينفع بيكي انتى كمان يا جميله وجزانا وإياكم وجعل الجنه مثوانا ومثواكم
ReplyDeleteويارب الناس تعرف فعلا ان زكاة العلم هي العلم كله عشان تبدأ تساعد بعض ونبقى دايما إيد واحده
وطبعا انتى كلمة شكرا على المجهودات اللى بتعمليها مش كفايه بجد :)